Your Favorite Daily Geeks

لوگ کہنے کو کیا نہیں کہتے

454

لوگ کہنے کو کیا نہیں کہتے

ہاں مگر برملا نہیں کہتے

تم ابھی ہو وفا سے نا واقف

ہم تمھیں بے وفا نہیں کہتے

اپنے دل کی تو سب ہی کہتے ہیں

آئنے کا کہا نہیں کہتے

ایک دنیا دکھائی دیتی ہے

ہم خلا کو خلا نہیں کہتے

خلق و خالق میں فرق ہے لازم

ناخدا کو خدا نہیں کہتے

جو دکھاتا ہے ظاہری صورت

ہم اسے آئنہ نہیں کہتے

ایسے اشعار میرے کیوں ہوتے؟

جو مرا مدعا نہیں کہتے

اپنے دل سے رجوع کر لیجے

مان لو ہم بہ جا نہیں کہتے

شاد! فطرت ہے کم نگاہوں کی

وہ کسی کو بڑا نہیں کہتے

You might also like